कलंकीस्थित एक होटलका कर्मचारीलाई झ्यालबाट फाले

३ वर्ष अगाडि

काठमाडौं – होटलमा बस्न आएका युवाहरुले होटलका कर्मचारीलाई झ्यालबाट फालेर घाइते बनाएका छन् । गएराति कलंकीस्थित नारायणी गेष्ट हाउसमा बस्न पुगेका तीन युवाहरुले होटलका कर्मचारी विवेक सुनारलाई दोस्रो तल्लाको झ्यालबाट फालेरका हुन् ।

पाल्ला घर भएका विवेक डेढ बर्ष अघिदेखी नारायणी गेष्ट हाउसमा काम गर्दै आएका थिए । एउटा कोठा लिएर बसेका उनीहरुको गेष्ट हाउस कर्मचारीसँग खानाको विषयमा विवाद सुरु भएको थियो । विवाद बढ्दै जाँदा युवाहरुले मिलेर विवेकलाई झ्यालबाट बाहिर फालेका थिए । विवेकको अहिले ग्राण्डी अस्पतालमा उपचार भइरहेको छ । घटनास्थलमा प्रहरी पुग्दा विवेक घाँटीमा तार बेरिएको अवस्थामा सडकमा पछारिएका थिए । विवेकको अहिलेसम्म होस खुलेको छैन ।

घटनामा संलग्न तीनै जनालाई प्रहरीले नियन्त्रणमा लिइसकेको छ । प्रहरी स्रोतका अनुसार पक्राउ पर्नेहरुमा विजय, निशान र अर्का एकजना रहेका छन् । तीनै जनाको थर भने खुल्न सकेको छैन । कलंकी आसपासमा डेरा गरेर बस्ने उनिहरु लागूऔषध सेवनकर्ता भएको प्रहरीको प्रारम्भिक अनुसन्धानबाट खुलेको छ । यस विषयमा थप अनुसन्धान भइरहेको प्रहरीले जनाएकोछ ।

 


सम्बन्धित शीर्षकहरु

खुल्ला पोस्ट